O Concello de Trabada vén de solicitar unha nova subvención á Axencia de Turismo de Galicia para a creación dunha área de autocaravanas no complexo deportivo municipal.
O proxecto presentado conta cun orzamento de arredor de 30.000 euros e enmárcase nunha liña de axudas destinada á mellora e creación de espazos turísticos. A solicitude foi tramitada de forma inmediata, ao tratarse dunha convocatoria por orde de entrada, presentándose tan só un minuto despois da apertura do prazo.
A actuación permitiría completar e reforzar os servizos xa existentes no complexo deportivo de Trabada, un espazo que nos últimos anos foi obxecto de diferentes melloras e que na actualidade conta con pista de pádel, pista multideporte, tirolina infantil, campo de bolos tradicionais, circuíto de pump track e unha zona de descanso con pérgolas de cuberta natural.
A nova área de autocaravanas viría complementar estas instalacións, aproveitando ademais infraestruturas xa existentes como os aseos e duchas, e incorporando servizos específicos como zona de baleirado de augas negras e grises, así como puntos de toma de corrente en cada praza, configurando deste xeito un espazo completo e adaptado ás necesidades deste tipo de turismo.
O alcalde de Trabada, Rubén García, destacou que “seguimos traballando para mellorar os nosos espazos e facer do noso concello un destino cada vez máis atractivo, aproveitando os recursos dos que dispoñemos e ampliando servizos que poidan atraer visitantes e dinamizar a economía local”.