O Concello de Trabada desenvolverá durante o curso 2026/2027 o Programa Municipal de Orientación e Acompañamento a Familias, composto por catro actividades que terán lugar na Casa da Cultura entre os meses de outubro de 2026 e maio de 2027.
A programación comezará o 20 de outubro, ás 16:30 horas, coa charla para familias «Sácalles partido ao teu estudo», centrada en ofrecer pautas para axudar aos nenos e nenas no seu rendemento académico.
A segunda actividade celebrarase o 1 de decembro, tamén ás 16:30 horas. Neste caso será un Espazo de Orientación a Familias baixo o tema «A educación en positivo», concibido como un grupo para dialogar, compartir e abordar cuestións relacionadas coa educación familiar.
Xa en 2027, o 30 de marzo terá lugar a charla «Educamos a atención», na que se tratarán pautas para estimular a atención na casa.
O programa completarase o 31 de maio cun novo Espazo de Orientación a Familias, nesta ocasión arredor do tema «Nenos e nenas con moito carácter».
Todas as actividades desenvolveranse ás 16:30 horas na Casa da Cultura de Trabada.
O Programa Municipal de Orientación e Acompañamento a Familias está promovido e financiado polo Concello de Trabada e será desenvolvido por Educando en Familia.
