O alcalde de Trabada, Rubén García, e o presidente da Deputación de Lugo, José Tomé, asinaron un convenio de colaboración por importe de 250.000 euros, destinado a financiar diferentes actuacións en varias parroquias do municipio.
As accións previstas ao abeiro deste acordo son as seguintes:
- Urbanización e mellora dos accesos ao centro social de Fórnea.
- Renovación do parque infantil de Fórnea.
- Mellora do envolvente do Teleclube de Vilaformán.
- Urbanización e mellora do Teleclube de Vilapena.
- Mellora dos accesos a Louro.
- Mellora dos accesos a Vilarbetote.
O alcalde de Trabada, Rubén García, destacou que “continuamos coa execución de diferentes proxectos en varias parroquias do noso concello, dando resposta ás necesidades da veciñanza e mellorando os espazos públicos que son de uso comunitario”.
García subliñou tamén que “seguimos traballando na elaboración de novos proxectos en todo o territorio do concello, co obxectivo de ofrecer servizos de calidade e infraestruturas axeitadas en todas as parroquias”.
O rexedor quixo ademais agradecer á Deputación de Lugo a súa colaboración: “sen este apoio sería moito máis difícil levar a cabo estas actuacións, que supoñen un avance importante para a mellora das nosas parroquias”.
Este convenio, un dos de maior importe asinado en Trabada nos últimos anos, é froito do traballo constante do equipo de goberno municipal, que mantén unha liña de diálogo permanente coas administracións para captar novos investimentos no concello.