Luns - Vernes 8:00 am - 15:00 pm

O CONCELLO DE TRABADA REMATA AS OBRAS DE RENOVACIÓN DO XIMNASIO E OS VESTIARIOS DO PAVILLÓN POLIDEPORTIVO MUNICIPAL

O CONCELLO DE TRABADA REMATA AS OBRAS DE RENOVACIÓN DO XIMNASIO E OS VESTIARIOS DO PAVILLÓN POLIDEPORTIVO MUNICIPAL

O Concello de Trabada informa aos seus veciños e veciñas do remate das obras de reforma dos vestiarios e o ximnasio do pavillón polideportivo municipal.

A actuación nos vestiarios foi na zona das duchas, renovando o pavimento por un novo e antideslizante, ademais de mellorar a rede de saneamento e os desagües. Segundo o informe técnico da empresa, cando realizaron os traballos de picado da baldosa existente detectouse que había moi pouco cemento, cun espesor de poucos centímetros e escasa consistencia.

No ximnasio, o concello adquiriu novas máquinas tanto de cardio (cintas de correr, bicicletas, air bike e remo) como aparatos de musculación (prensa, dominadas asistidas) e un banco de estiramentos, ademais de repoñer os espellos existentes. Desta forma, mellorouse o equipamento do ximnasio coa finalidade de ampliar as posibilidades de exercitarse e ofrecerlle un mellor servizo aos usuarios.

“Dende o goberno municipal solicitamos en tres ocasións axuda á Xunta de Galicia, dúas veces a través da convocatoria de axudas de Vicepresidencia, que dirixe Alfonso Rueda, e unha vez na reunión mantida co secretario xeral de Deportes, José Manuel Lete, pero decidiron non colaborar con este proxecto e tivemos que esperar, como sucede en moitas ocasións, a poder realizar estas actuacións”, lembra a alcaldesa de Trabada, Mayra García Bermúdez.

Finalmente, asinouse coa colaboración da Deputación de Lugo un convenio para poder levar a cabo estas melloras tan necesarias, tanto polos usuarios do ximnasio como polo inmoble en sí, xa que o mal estado dos vestiarios producía filtracións.

Aínda que o orzamento inicial das dúas actuacións era de 45.041,14 euros, incluídos os honorarios, dos cales a Diputación aportaba 44.000 euros e o concello 1.041,14 euros, despois da licitación do proxecto adxudícaronse as obras por 35.000 euros.

O Concello de Trabada solicitará esta baixa económica á Deputación de Lugo, “algo que permite a institución provincial e que volvemos a solicitar que a Xunta de Galicia tamén o permita, xa que as baixas que se producen nas licitacións en vez de quedar a disposición dos concellos para realizar con eses cartos outras actuacións no municipio, revirten na Xunta de Galicia”, engade García Bermúdez.

“Para o noso grupo de goberno esta actuación é fundamental porque o fomento do deporte e os hábitos de vida saudables son dúas prioridades, estas melloras no polideportivo eran moi necesarias”, remata a alcaldesa de Trabada.

Páxina anterior O CONCELLO DE TRABADA CONSEGUE UNHA SUBVENCIÓN PARA MELLORAR O TRAMO DO CAMIÑO DE SANTIAGO QUE UNE O MUNICIPIO COA FONTE DE PORTO DO MALLE

Concello de Trabada

Rúa do Concello, 15, 27765
Trabada, Lugo

Horario:

Luns - Vernes 8:00 am - 15:00 pm

Concello de trabada 2021 - Todos os dereitos reservados

gl_ESGalego