O Concello de Trabada vén de poñer en marcha a primeira fase das obras de renovación da área recreativa de A Choza, situada na parroquia da Ría de Abres. Esta actuación contará cun investimento de 30.000 euros dunha subvención concedida pola Dirección de Turismo de Galicia.
Nesta primeira fase prevese a substitución de parte do valado de madeira por materiais reciclados e de imitación madeira, así como a renovación das papeleiras, fontes e mesas da zona recreativa. O obxectivo é mellorar e modernizar este espazo tan frecuentado pola veciñanza e visitantes, garantindo a súa conservación e adaptándoo a criterios de sustentabilidade e accesibilidade.
O alcalde de Trabada, Rubén García, destacou que “continuamos traballando na mellora dos nosos espazos turísticos e naturais, que son un dos grandes atractivos do noso concello. Grazas a este tipo de axudas podemos seguir renovando infraestruturas e ofrecendo espazos de lecer en mellores condicións para todos”.
García lembrou tamén que “esta actuación súmase a outras realizadas nos últimos anos, como a creación da área de autocaravanas na Ría de Abres ou a construción dunha nova área recreativa en Villapena”.
Con este proxecto, o Concello de Trabada reafirma o seu compromiso coa posta en valor do patrimonio natural e coa creación de espazos turísticos e de ocio accesibles, seguros e respectuosos co medio ambiente.